राष्ट्रीय पुरस्कार विजेत्या पार्श्वगायिका सावनी रवींद्र यांना ‘भारतरत्न लता मंगेशकर पुरस्कार 2026’ प्रदान
भारतरत्न स्वरसम्राज्ञी लता मंगेशकर यांच्या चौथ्या जयंतीनिमित्त आयोजित करण्यात आलेल्या विशेष संगीत कार्यक्रमात राष्ट्रीय पुरस्कार विजेत्या पार्श्वगायिका सावनी रवींद्र यांना मंगेशकर कुटुंबियांच्या वतीने दिला जाणारा प्रतिष्ठेचा ‘भारतरत्न लता मंगेशकर पुरस्कार 2026’ प्रदान करण्यात आला.
संगीत क्षेत्रातील उल्लेखनीय योगदानाची दखल घेत सावनी रवींद्र यांना हा मानाचा पुरस्कार प्रदान करण्यात आला. मंगेशकर कुटुंबियांच्या हस्ते मिळालेला हा सन्मान त्यांच्या कारकिर्दीतील अत्यंत अभिमानास्पद आणि भावनिक क्षण ठरला.
या विशेष सोहळ्याला ज्येष्ठ उद्योगपती प्रतापराव पवार, भावगंधर्व पं.हृदयनाथ मंगेशकर, ज्येष्ठ गायिका उषा मंगेशकर, मंगेशकर कुटुंबीय, पद्मश्री पं. सुरेश वाडकर, मा. चंद्रकांतदादा पाटील, मेधा कुलकर्णी, सुप्रसिद्ध गायक राहुल देशपांडे यांच्यासह विविध क्षेत्रांतील अनेक मान्यवर उपस्थित होते. या सर्व दिग्गजांच्या उपस्थितीत सावनी रवींद्र यांना हा प्रतिष्ठेचा पुरस्कार प्रदान करण्यात आला.
पुरस्कार स्वीकारल्यानंतर आपल्या भावना व्यक्त करताना सावनी रवींद्र म्हणाल्या, "मंगेशकर कुटुंबियांच्या हस्ते मिळालेला हा ‘भारतरत्न लता मंगेशकर पुरस्कार’ माझ्यासाठी केवळ सन्मान नाही, तर माझ्या संपूर्ण संगीतप्रवासाला लाभलेला सर्वोत्तम आशीर्वाद आहे. लतादीदींच्या नावाने दिला जाणारा हा पुरस्कार स्वीकारताना शब्द अपुरे पडत आहेत."
त्यांनी हा सन्मान आपल्या आई-वडिलांना – ज्येष्ठ शास्त्रीय गायक डॉ.रविंद्र घांगुर्डे आणि डॉ. वंदना घांगुर्डे, तसेच आपल्या सर्व गुरुजनांना समर्पित केला. "माझ्या आयुष्यात संगीताचे संस्कार रुजवणारे माझे आई-वडील, मार्गदर्शन करणारे माझे गुरुजन आणि माझ्यावर प्रेम करणारे रसिक यांच्या आशीर्वादांशिवाय हा क्षण शक्य झाला नसता," अशा शब्दांत त्यांनी कृतज्ञता व्यक्त केली.
तसेच लतादीदींच्या अमूल्य संगीतवारशाने अनेक पिढ्यांना प्रेरणा दिली असून, त्यांच्या नावाने दिला जाणारा हा पुरस्कार मंगेशकर कुटुंबियांच्या हस्ते स्वीकारणे हा आपल्या आयुष्यातील सर्वांत अविस्मरणीय आणि भावनिक क्षणांपैकी एक असल्याचेही त्यांनी नमूद केले.
संगीतविश्वातील सर्वोच्च प्रेरणास्थान असलेल्या भारतरत्न लता मंगेशकर यांच्या नावाने दिला जाणारा हा पुरस्कार प्राप्त होणे म्हणजे प्रत्येक गायक-गायिकेसाठी मोठा गौरव असून, सावनी रवींद्र यांच्या यशाच्या शिरपेचात मानाचा तुरा ठरला आहे.
