“माझ्यासाठी स्क्रिप्ट नेहमीच सर्वात आधी येते”: नव्या दिग्दर्शकांसोबत सतत काम करण्यामागची भूमिका सांगतोय आयुष्मान खुराना
गेल्या दशकाहून अधिक काळ आयुष्मान खुरानाने पारंपरिक चौकटींना आव्हान देणाऱ्या कथा निवडत आपली कारकीर्द घडवली आहे. त्याचबरोबर नव्या आणि उदयोन्मुख दिग्दर्शकीय आवाजांना त्यांच्या कथा सांगण्यासाठी व्यासपीठ देण्याची संधीही त्याने सातत्याने दिली आहे. उडता तीरच्या माध्यमातून अभिनेता पहिल्यांदा दिग्दर्शन करणाऱ्या किंवा हिंदी सिनेमात पदार्पण करणाऱ्या दिग्दर्शकांसोबतच्या सात चित्रपटांच्या एका खास प्रवासाला पूर्णत्व देणार आहे.
आयुष्मान खुरानाने सातत्याने नव्या आणि उदयोन्मुख दिग्दर्शकीय आवाजांसोबत काम करण्याचा विश्वास दाखवला आहे. दम लगा के हईशामध्ये शरत कटारिया, शुभ मंगल सावधानमध्ये आर. एस. प्रसन्ना, ड्रीम गर्लमध्ये राज शांडिल्या, शुभ मंगल ज्यादा सावधानमध्ये हितेश केवल्या, डॉक्टर जीमध्ये अनुभूती कश्यप, एन अॅक्शन हिरोमध्ये अनिरुद्ध अय्यर आणि आता उडता तीरमध्ये आकाश ए. कौशिक यांच्यासोबत त्याने काम केले आहे.
या चित्रपटांचे व्यावसायिक निकाल वेगवेगळे असले, तरी या सर्व चित्रपटांमधून आयुष्मानचा एक सातत्यपूर्ण दृष्टिकोन स्पष्ट होतो—नवे विचार, हटके विषय आणि स्पष्ट क्रिएटिव्ह व्हिजन असलेल्या फिल्ममेकर्सना पाठबळ देण्याची त्याची तयारी.
डेब्यू दिग्दर्शकांसोबत आयुष्मानच्या सर्वाधिक यशस्वी व्यावसायिक चित्रपटांमध्ये दम लगा के हईशा आणि ड्रीम गर्ल यांचा समावेश आहे. तर उडता तीर हा लेखक आकाश ए. कौशिक यांच्या फीचर दिग्दर्शकीय पदार्पणाचा चित्रपट आहे. कौशिक यांनीच या आगामी देशभक्तीवर आधारित कॉमेडीचे लेखन आणि दिग्दर्शन केले असून, हा चित्रपट 9 ऑक्टोबर 2026 रोजी सिनेमागृहात प्रदर्शित होणार आहे.
आपल्या काम करण्याच्या पद्धतीबद्दल बोलताना आयुष्मान खुराना म्हणाला, “माझ्यासाठी स्क्रिप्ट नेहमीच सर्वात आधी येते. एखादा फिल्ममेकर त्याचा पहिला चित्रपट दिग्दर्शित करत आहे की दहावा, याकडे मी पाहत नाही… माझ्यासाठी महत्त्वाचं असतं ते म्हणजे त्याच्याकडे मला उत्साहित करणारी कथा आणि व्हिजन आहे का. माझ्या करिअरमधील काही सर्वात लक्षात राहिलेले अनुभव हे नव्या आवाजांसोबत काम करताना आले आहेत. ते आपल्या सोबत एक वेगळी भूक, फ्रेशनेस आणि ओळखीच्या विषयांकडे वेगळ्या पद्धतीने पाहण्याचं धाडस घेऊन येतात.
माझा नेहमीच असा विश्वास राहिला आहे की एखाद्या कथेच्या मागे असलेला कन्विक्शन मजबूत असेल, तर त्या कथेचं नक्कीच पाठबळ करायला हवं.”
याच विचारसरणीने आयुष्मानची पडद्यावरील ओळख घडवली आहे. बॉडी इमेज आणि इरेक्टाइल डिस्फंक्शनपासून LGBTQ+ प्रेम, पारंपरिक चौकटीबाहेरील नातेसंबंध आणि सामान्य माणसावर येणारा दबाव अशा विविध विषयांपर्यंत, त्याच्या चित्रपटांच्या निवडींनी सातत्याने काही अस्वस्थ करणाऱ्या विषयांवर विनोदी आणि मनोरंजक पद्धतीने चर्चा घडवून आणली आहे.
त्याचा लेटेस्ट कोलॅबोरेशन उडता तीर हीच भूमिका जॉनर-बेंडिंग स्पाय कॉमेडीच्या विश्वात घेऊन जातो. आयुष्मान या चित्रपटात बिलाल अहमदची भूमिका साकारत असून, तो एक पाकिस्तानी गुप्तहेर आहे. मात्र, स्मृतीभ्रंश झाल्यानंतर तो स्वतःला भारतीय समजू लागतो. ट्रेलर लॉन्चच्या वेळी अभिनेत्याने या चित्रपटाचं वर्णन “पॅट्रियॉटिक कॉमेडी” असं केलं होतं. त्याने पुढे सांगितलं होतं की, तो स्क्रिप्टची मागणी जशी असेल त्याप्रमाणे काम करतो आणि स्वतःला “डायरेक्टरचा बेबी” मानतो.
आयुष्मान पुढे म्हणाला, “प्रत्येक नवा दिग्दर्शक सेटवर एक वेगळी एनर्जी घेऊन येतो. उडता तीरच्या बाबतीत मला केवळ त्याचा जॉनर आकर्षित करत नव्हता, तर आकाशने निर्माण केलेलं विश्वही मला आकर्षित करत होतं. एकाच वेळी अराजक, मजेदार, भावनिक आणि एका मोठ्या विचाराशी जोडलेली स्क्रिप्ट मिळणं ही दुर्मीळ गोष्ट आहे. मला त्या व्हिजनसमोर स्वतःला पूर्णपणे समर्पित करायचं होतं आणि या व्यक्तिरेखेला मला एखाद्या अनपेक्षित ठिकाणी घेऊन जाण्याची मुभा द्यायची होती.”
आयुष्मानसाठी नव्या दिग्दर्शकांसोबत काम करणं हा एखादा एकदाच केलेला प्रयोग नाही, तर त्याच्या व्यापक क्रिएटिव्ह फिलॉसफीचा एक भाग आहे. त्याच्या फिल्मोग्राफीमध्ये अशा कोलॅबोरेटर्ससोबत काम करण्याची पसंती वारंवार दिसून येते, जे रिस्क घेण्यास, ओळखीच्या फॉर्म्युलांवर प्रश्न उपस्थित करण्यास आणि मेनस्ट्रीम हिंदी सिनेमातील हिरो म्हणून प्रेक्षकांनी यापूर्वी कदाचित न पाहिलेली पात्रं साकारण्यास तयार असतात. त्यामुळे दम लगा के हईशापासून उडता तीरपर्यंतचा हा सात चित्रपटांचा प्रवास केवळ कोलॅबोरेशन्सची यादी नाही. हा आयुष्मान खुरानाच्या त्या दृष्टिकोनाचं प्रतिबिंब आहे, ज्यामध्ये तो टॅलेंटला सुरुवातीच्या टप्प्यावर ओळखण्यावर, क्रेडेन्शियल्सपेक्षा कन्विक्शनवर विश्वास ठेवण्यावर आणि पडद्यापलीकडेही चर्चा निर्माण करू शकणाऱ्या कथांसाठी स्वतःला कायम खुले ठेवण्यावर भर देतो.
