*जन्मा- मरणाच्या आणि नशिबाच्या गोष्टींची अभूतपूर्व कथा 'मंगला' चित्रपटातून १७ जानेवारी २०२५ रोजी उलगडणार*
*'नशिबात लिहिलेलं मरण हेच नशीब बदलणार का?', 'मंगला' चित्रपटाच्या टीझरने संभ्रमात अडकवलं*
*शिवाली परबच्या 'मंगला' चित्रपटाच्या टीझरने वाढवली उत्सुकता, ऍसिड अटॅक नेमका का?, याचा होणार खुलासा*
'बाळाचे पाय पाळण्यात दिसतात' हे बरेचदा ऐकलं आहे. मात्र, एखाद्याच्या जन्माच्या वेळी त्याचं मरण त्याच्या नशिबात लिहिलं असेल असे फार कमी जणांना वाटत असावं. आणि एखाद्याच्या वाटेला असं मरण, असं संकट आलं तर त्या मरणाला लढा देत जिंकण्याची जिद्द त्यांच्यात येते आणि ही लढाई ते पारही करतात. हो जन्मा- मरणाच्या आणि नशिबाच्या गोष्टींची अभूतपूर्व कथा 'मंगला' या चित्रपटातून मोठ्या पडद्यावर पाहायला मिळणार आहे. काही दिवसांपासून 'मंगला' या चित्रपटाचे पोस्टर सोशल मीडियावर तुफान व्हायरल झाले. ऍसिड हल्ल्यामुळे एका सुंदर अशा गायिकेची झालेली वाईट अवस्था या पोस्टरमधून समोर आली. यानंतर आता चित्रपटाच्या टीझरने चित्रपटाबाबतची उत्सुकता वाढवून ठेवली आहे. हा ऍसिड अटॅक नेमका का?, आणि यानंतर मंगलाने या संकटावर मात करत दिलेला लढा या चित्रपटात पाहणं रंजक ठरणार आहे.
सध्या सर्वत्र या चित्रपटाच्या टिझरने हा हल्ला नेमका का झाला?, हा हल्ला कोणी केला?, अशा अनेक प्रश्नांना फाटा फुटल्या आहेत. अशा या आशयघन व भयावह कथेचा सार घेऊन 'मंगला' हा चित्रपट पुढील वर्षी १७ जानेवारी २०२५ पासून चित्रपटगृहात प्रदर्शित होणार आहे. सत्य घटनेवर आधारित असलेल्या आणि भयावह हल्ल्यातून वाचलेल्या मंगला या सुप्रसिद्ध गायिकेचा जीवन प्रवास 'महाराष्ट्राची हास्यजत्रा' फेम शिवाली परब मार्फत या चित्रपटातून उलगडणार आहे. टीझरमध्ये पाहिल्याप्रमाणे चेहऱ्यावर झालेल्या ऍसिड हल्ल्याची खूण सतावत आहे. हे चित्र पाहण्याजोगं नसलं तरी या मागील गहन विषय साऱ्यांना खुर्चीत खिळवून ठेवेल यांत शंका नाही.
'रैश प्रोडक्शन प्रा.लि' आणि 'फक्त आणि फक्त एंटरटेनमेंट' प्रस्तुत 'मंगला' या चित्रपटाच्या दिग्दर्शनाची धुरा अपर्णा हॉशिंग यांनी उत्तमरीत्या पेलवली आहे. तर चित्रपटाच्या निर्मितीची बाजू अपर्णा हॉशिंग, यशना मुरली, मोहन पुजारी, मिलिंद फोडकर यांनी सांभाळली आहे. चित्रपटाची कथा आणि पटकथा सौरभ चौधरीची असून संवाद प्रथमेश शिवलकर याचे आहेत. तर संपूर्ण चित्रपटाचे संगीत शंतनु घटक याचे आहे. एका वेगळ्या धाटणीच्या चित्रपटातून शिवाली परबला मोठ्या पडद्यावर पाहणं उत्सुकतेचं ठरेल. मंगलाची ही खरीखुरी कथा १७ जानेवारी २०२५ रोजी मोठ्या पडद्यावर पाहणं रंजक ठरेल.
